ಇಬ್ಬನಿಯ ಮಬ್ಬಿನಲಿ ಸುಬ್ಬ ಹೊರಟನು ಯಾನ
ಇಬ್ಬದಿಯ ಕಬ್ಬಿನ ಜಲ್ಲೆ ನುಸುಳಿನ ಮಧ್ಯೆ ॥
ಹೊತ್ತು ಅಂದಾಜು ಕ್ಷಣ ಕೋಳಿ ಕೂಗಲು ಇನ್ನೂ
ಬಿತ್ತರದಾಗಸದಿ ನಕ್ಷತ್ರ ಹೊಳೆಯುತಿದ್ದವು ಇನ್ನೂ
ಮತ್ತದೇ ಸದ್ದು 'ಜುಳು-ಜುಳು' ಗದ್ದೆಗಿಳಿಯುವ ನೀರು
ಸುತ್ತಲಿನ ಅಪಾಯಗಳ ತಿಳಿದು ಅರುಹುವವರ್ಯಾರು? ||೧||
ಸಲಹಿ ಸಾಕಿದ ಬಂಧು ಬೆಳೆಸಿ ತಿಳಿಸಿದ ಜನರು,
ಹೊಲ-ಗದ್ದೆಯ ಬೇಲಿ ದಾಟಿ ಹೋಗದಿರೆಂದರು.
ಸುಲಭವಲ್ಲೆಂದೆನುತ ವಿದ್ಯೆ ಬೇಡೆಂದವರು,
ಛಲದ ದೃಢ ನಿಶ್ಚಯಕ್ಕೆ ಬೆಂಬಲಿಸುವವರ್ಯಾರು? ||೨||
ಸಣ್ಣ ದಿಂದಲೇ ಸುಬ್ಬ ಚುರುಕು ಬುದ್ದಿಯ ಹುಡುಗ
ಕಣ್ಣು ಹಾಯಿಸಿದರಲ್ಲಿ ಲಕ್ಷ್ಯ ಸಾಧಿಪ ಗಿಡುಗ,
ಸುಣ್ಣ ಬಣ್ಣಕೆ ವೈರಿ ಇವನ ಕಾಯದ ರಂಗು,
ಮಣ್ಣು ಬಿಡದೇಕೆ ಇವನ ಮೀರಿಸುವಲ್ಲಿ ಕೊರಗು? ||೩||
ತಂದೆ-ತಾಯಿಗೆ ಆನೆ ಸುಖನಿದ್ರೆ ಮೆದ್ದು ಮುದ್ದೆ
ಮುಂದೆ ಬರುವಾಸೆ ಅವನಿಗೆ, ನಿರ್ಲಕ್ಷಿಸುತ ನಿದ್ದೆ,
ಮಂದಮತಿಯರ ಬಿಟ್ಟು ಜಗವ ತಿಳಿಯುವ ಆಸೆ,
ನಿಂದು ಕಿವಿಮಾತು ಕೇಳ್ವ ಸುಬ್ಬನಿಗೆ ಇದು ಬರೀ ಕನಸೇ!||೪||
ಹೊಸ ಸೂರ್ಯೋದಯಕಾಗಿ ತವಕ ನಾಡಿ ಮಿಡಿತದಲ್ಲಿ
ಹೊಸ ಭಾಷೆ ಬರೆಯಬೇಕೆಂಬ ತುಡಿತ ಮೈ ಮನದಲ್ಲಿ
ಹೊಸಕಿಹಾಕುವ ಕ್ರೋಧ, ಹಳ್ಳಿ ಗುಗ್ಗಿನ ಬಿರುದು,
ಹಸನಾದ ಬದುಕಿನ್ನು ತೃಪ್ತಿ ಸಾಗರದಲ್ಲಿ ಬಿಂದು ||೫||